КОНКУРС ПĔТĔМЛЕТĔВĔ

       Чăваш наци конгресĕ çумĕнчи чăваш чĕлхипе литератури вĕрентекенсен Ассоциацийĕ йĕркеленĕ И.Я. Яковлев çуралнăранпа 175 çул çитнине тата Раççей Федерацийĕн Вĕрентекенпе ăс паракан çулталăкне халалланă «Ман юратнă вĕрентекен» регионсем шайĕнчи литература пултарулăх конкурсне пĕтĕмлетнĕ. 2023 çулхи нарăс уйăхĕн 1-мĕшĕнчен пуçласа 2023 çулхи ака уйăхĕн 1-мĕшĕччен иртнĕ конкурса Раççей Федерацийĕн регионĕсен тата Чăваш Республикин пĕтĕмĕшле пĕлӳ паракан вĕренӳ учрежденийĕсен 5–11-мӗш класӗсенче, професси вӗренӗвӗн учрежденийӗсенче (колледжсемпе техникумсенче), аслă шкулĕсенче вӗренекенĕсенчен, тĕрлĕ организацийĕнче ĕçлекен учительсенчен, библиотекарьсенчен, культура ĕçченĕсемпе вĕренӳ ĕçĕн ветеранĕсенчен 110 ал çыру килнĕ.

     Жюри конкурса килнĕ 110 хайлава тишкерсе пăхса тухнă, çырни тĕп шухăшпа килĕшсе тăнине, вĕрентекен сăнарне хакласа автор хăй шухăшне палăртнине, шухăша çыхăнуллă йĕркелесе çырнине шута илсе ĕçсене хак панă, 14 çĕнтерӳçĕпе 27 призёра палăртнă. Призёрсем хушшинче Кăнар вăтам шкулĕнче чăваш чĕлхипе литературине вĕрентекен Рина Рудольфовна Трофимова ячĕ те пур. Саламлатпăр! Эпир унпа мухтанатпăр!